Baba Pünhan. Mən nə dedim ki?!
Şaxtalı ünvanımıza
Min şükürlər dilərəm Rəhmli
Rəhmanımıza,
Nəzərin saldı bu əhvali - pərişanımıza.
Millətin dərdi, demə məndə qübar
etmiş idi,
Onu cərrah kəsib atdı xiyabanımıza.
Demə bu dərdi qoparmaq neçə min
dollar imiş,
Beş minə dəydi bıçaq sineyi-qalxanımıza.
Halal olsun sözə qiymət verən
oğlanlara ki,
Qatdı imkanını heç olmayan imkanımıza.
"Opires"dən sora əmma ki, göy
ilən gedirəm,
İqtidardan deyəsən qan vurulub qanımıza.
Bizə torpaqları qaytarmağa
cərrah gərək,
Çeçenin qeyrətini "şunt" eləyə canımıza.
Necə getsin bu gözəl isti
otaqdan ayağım,
O Rəsulzadədiki şaxtalı ünvanımıza.
"Qəlbim"i Ben Əli bəy şunt
eləyəndən sonra,
Əli meydanı gərəkdir Baba Pünhanımıza.
22 noyabr, 2001
Mərkəzi klinik xəstəxana
Mən Qarabağçün yaşadım
Elə zənn eyləmə ki, tək
yaşamaqçün yaşadım,
Mən elin dərdini gizlin daşımaqçün yaşadım.
Bir ürək dözmədi yüksəklərin
alçaqlığına,
Ona güc verdi xuda dözməli dağçün yaşadım.
Gözümün qarəsi əşk ilə töküldü
varağa,
Varağım qarələnincə bu varağçün yaşadım.
Gələcək nəslə həqiqətləri
çatdırmaq üçün,
Anadan olmayan onlarla uşaqçün yaşadım.
İblisin son gününə xeyli marağım
var idi,
Allahın hökmü ilə böylə maraqçün yaşadım.
Mən demişdim kişi yox, ölkə
papaqnan doludur,
Bu mənə yer elədi, bax bu papaqçün yaşadım.
Bir Müqəddəs qonağın gəlməsin
hiss etmədəyəm,
Əlli dörd ildi dözüb sirli qonaqçün yaşadım.
Pünhanın bağın alıb zorla
keçirtdin adına,
Sən bu bağçün yaşadın mən Qarabağçün yaşadım.
23 noyabr, 2001
Mərkəzi klinik xəstəxana
Ağ atlı oğlan
hardadır?
Haram alıb marağmızı, ağ atlı
oğlan hardadır?
Aram tutub qırağmızı, ağ atlı oğlan hardadır?
Tox arxasın çəkib gedir, ac
ağzını tikib gedir,
Soran da yox sorağmızı, ağ atlı oğlan hardadır?
Qızartmışıq yanağmızı,
qısaltmışıq balağmızı,
Xuda verib talağmızı, ağ atlı oğlan hardadır?
Bu erməni dığasının, əgər başı
kəsilməsə,
Gəlib kəsər qulağmızı, ağ atlı oğlan hardadır?
Düşüncəmiz saray, maşın, fəqirin
atmışıq daşın,
Bəyənmərik çolaqmızı, ağ atlı oğlan hardadır?
Gəlin baxın qonağmıza, çıxıb
bizim ağacmıza
Qırıb tökür budağmızı, ağ atlı oğlan hardadır?
Əsilmizi itirmişik, kənarə gen
ötürmüşük,
Çoxaltmışıq calağmızı ağ atlı oğlan hardadır?
Yuxarıda harın gedir, aşağıda
qarın gedir,
Vərəm tutub uşağmızı, ağ atlı oğlan hardadır?
Ərəb elində bir sürü, Azərbaycan
maralları,
Soxub yerə papağmızı, ağ atlı oğlan hardadır?
Çobanların siyasəti, siyasətin
çobanları,
Alıb bizim çomağmızı, ağ atlı oğlan hardadır?
Nə sənnənik, nə mənnənik, fəqir
Məmədhəsənnənik,
İtirmişik ulağmızı, ağ atlı oğlan hardadır?
Xəbər çatıbdı Pünhana, gəlib ağ
atlı dövrana,
O yandırar çırağmızı, ağ atlı oğlan hardadır?
5 fevral, 2002
Kim hara deyir, ora
gedirik
Bu Vətənimin günü belədir, uzunu
qısa eni belədir,
Ata-babamın geni belədir gora desələr gora gedirik.
Qadanı alım, qınama bizi,
Kim hara deyir ora gedirik.
Qazanı mənəm, qazanan odu,
harama girib qızınan odu,
Əli cibimə uzanan odu, əlinə qoyub para gedirik.
Qadanı alım qınama bizi,
Kim hara deyir ora gedirik.
Nə darıxırıq nə yad edirik,
darıxana da irad edirik,
Bu bağımızı abad edirik, o bağa üzü qara gedirik.
Qadanı alım qınama bizi,
Kim hara deyir ora gedirik.
Dərimi soyub, soyumu bölür,
quyumu görüb quyumu bölür,
Dənizə girib suyumu bölür gözü görəsi tora gedirik.
Qadanı alım qınama bizi,
Kim hara deyir ora gedirik.
Bu ora gedir, o bura gəlir, bu
ona deyir, o buna deyir,
Bu onu yeyir, o bunu yeyir biz isə "Böyükşora" gedirik.
Qadanı alım qınama bizi,
Kim hara deyir ora gedirik.
Qula ağayıq, pula əsirik pula
görə qul cibi kəsirik,
Nə gecikirik, nə tələsirik, təzə xanayıq zora gedirik.
Qadanı alım qınama bizi,
Kim hara deyir ora gedirik.
Ərəbə baxıb göbək açırıq, xərəbə
baxıb kürək açırıq,
Soyuna-soyuna çiçək açırıq, boyana-boyana bara gedirik.
Qadanı alım qınama bizi,
Kim hara deyir ora gedirik.
Ay saçı qısa Suray xanım, ay əri
olan subay xanım,
Əri "dub" özü Dubay xanım, bu gediş ilə hara gedirik.
Qadanı alım qınama bizi,
Kim hara deyir ora gedirik.
Elimiz itib, obamız itib anamız
itib, atamız itib,
Ərimiz ölüb, yaşımız ötüb çörəyə görə kora gedirik.
Qadanı alım qınama bizi,
Kim hara deyir ora gedirik.
İkiqat olan iki beli var, səsə
qoyulan iki əli var,
Vəkil olanı iki dili var, deyir MM-ə xora gedirik.
Qadanı alım qınama bizi,
Kim hara deyir, ora gedirik.
Kimə nə ki, bu çapa ilişir, kimə
nə ki, bu YAP-a ilişir,
Özü dolayan sapa ilişir, sapa-sapa yol dara gedirik.
Qadanı alım qınama bizi,
Kim hara deyir, ora gedirik.
12 dekabr, 2001
Səbəbkarə şükür
Borc verir faizə dost dostuna,
əğyarə şükür,
Ölüb öldürmə hələ yoxdusa dostlarə şükür.
Qarabağ davası bu millətin açdı
içini,
Qara ağdan belə ayrıldı, səbəbkarə şükür.
Seçkilər vaxtı bir az zəhrimar
atdı, yaşadıq,
İndisə təkcə zəhərdir, o zəhrmarə şükür.
Nə pulum var, nə işim var, nə
bir əynim, nə başım,
Atmayıbdırsa mitilmi bayıra, yarə şükür.
Ağızı şorpalılar, azəri
avropalılar,
Öpüşürlər küçədə, ay kişi, bulvarə şükür.
Bir zaman qız-gəlinə şalvarı
irad elədik,
İndi gündəyməzi vitrindədi, şalvarə şükür.
Heç fikir çəkmə ki, testdən
kəsilərsən, a bala,
Onu da qurdalayırlar, neçə dollarə şükür.
Mənə can borcunu faizlə
veribdirsə Xuda,
Onu Pünhandan alıb yüz ilə qurtarə şükür.
13 iyun, 2001
Meydan belə dirçəldi
Ruh verdi Xuda cismə, insan belə
dirçəldi,
Heç olmadı insanda, nöqsan belə dirçəldi.
Bir xeyli zaman ötdü, əmma
yaranan bir gün,
Bu dirçəlişə oldu peşman belə dirçəldi.
Ruh göylü bədən yerli, başlandı
dalaş-dava,
Söz düşdü yer üstündə şeytan belə dirçəldi.
Bir gün belə minvalnan bu
Azərbaycanda,
Məqsədlərin uğrunda imkan belə dirçəldi.
Minlərlə piyadayçün bağlandı
bütün yollar,
Top vurdu Vəzir qaçdı meydan belə dirçəldi.
Nəsrani qırıb-çatdı, bizsə
oturub-durduq.
Təslimçi növü üzrə idman belə dirçəldi.
Çox kəndi soyub gəldi, yəqin ki,
doyub gəldi,
Xankəndi qoyub gəldi bu "xan" belə dirçəldi.
Əql ilə dolu başlar, təyyarədə
odlandı,
Xatircəm olub bundan, nadan belə dirçəldi.
Millət oda yandıqca, mətləbləri
qandıqca,
Atəşkəs uzandıqca düşman belə dirçəldi.
Ol vəqti Mübariz də, qulpnan
çıxıb ekranda,
Qulpsuzlara qulp qoydu, ekran belə dirçəldi.
Dünyaya vida etdi, bir ömrü
təmam etdi,
Ta zühr İmam etdi, Pünhan belə dirçəldi.
16 may, 2001
Ayrapalan şəklində
Dəyişir dövr zaman içrə yaman
şəklində,
Görürük indi badımcanı banan şəklində.
Tökülən qanların üstündə
saraylar tikdik,
Ağladıq sonra xiyabanda yalan şəklində.
Nə iqtidarda təpər var, nə
müxaliflərdə,
Qisası erməniyə göstərə qan şəklində.
Satıldı doğma vətən kim dedi, bu
böhtandır,
İcarə eylədi bir dəstə klan şəklində.
Bəlkə göylərdə müsəlmanın
ahu-zarı imiş,
Toxunub Pentaqona ayrapalan şəklində.
Çalışır kafirə öz doğmasıtək əl
tutsun,
Danışır amma müsəlmanla ilan şəklində.
Deyirəm bəlkə müxalifdə də varis
olsun,
Necə ki, iqtidarda var o plan şəklində.
Hərə bir cür daşıyır söz yükünü
Pünhanın,
Kimi dürdanə kimi, kim də palan şəklində.
30 oktyabr, 2001
Üz asvaltdısındandır
Uduzmaq cürbəcürdür, bax,
bizimki matdısındandır,
Səbəbdir haqq piyada ağ yalanlar atdısındandır.
Saatmız gah uruscan fırlanır,
gahi amerkanca,
İki əqrəb arasında bu xəlq it-batdısındandır.
Saatlar dal ola yaxud qabaq fərq
eyləməz əsla,
Kasıbçün sutkanın hər bir anı fəryaddısındandır.
Neçə ildir bu torpaqda ürək
partlatdı haqsızlıq,
Buna terror deyən yox, amma bu üçqatdısındadır.
Şəkillər görmüşəm vallah bir il
keçsə solur rəngi,
Vəkillər görmüşəm billah üzü asfaltdısındandır.
Nə evdə arvadından əl çəkir, həm
nə Siranuşdan,
Demə hər ehtimal üçün iki arvaddısındandır.
Vəhabi kimdi, İslam kim, bunu
əla bilir Corc Buş,
Bilir Vəhhab ənd Hempfer kimin ştatdısındandır.
Köçəryanə dedim nefti get al
qərdeşdiyün rusdan,
Dedi sizdən gələn gizlin nöyüt lap daddısındandır.
Zamanın Sahibi əqrəbləri taxtdan
salar, Pünhan,
O Sahib ki, Quranda həqq ilə isbatdısındandır.
23 oktyabr, 2001
Nimdaş aparatnan
gedirik
Demə at yoxdu onunçün belə
matnan gedirik,
Qalxginən şahə bu il cəng elə atnan gedirik.
Vaxtı öldürdüyümüzçün bizi həbs
etsə zaman,
Deyərik əqrəbi ən paslı saatnan gedirik.
Atamızdan görüb öyrənmişik
harınlığı biz,
Başlanandan at ili dərsə "fiat"nan gedirik.
Zaçotun qiyməti beş, imtəhan on
"şirvan"dır,
Gələcək əsrə bu qiymətdə savadnan gedirik.
Kimi sağdan, kimi soldan, kimi
puldan sildik,
Əmin olduq ki, Əminsiz bir həyatnan gedirik.
Atalar söylədi qaçmaq da
igidlikdəndir,
Hara getsək belə mənalı sitatnan gedirik.
Mülkümüz olsa da hündür bizi
düşmən görmür,
Qorxudan evdə də çünki yatayatnan gedirik.
Başı boş məmura başsız dedim, o
güldü mənə,
Dedi baş olsa da boş, əldə peçatnan gedirik.
Nə şəkil çəkdiririksə üzümüz
qarə çıxır,
Çünki ildən ilə nimdaş aparatnan gedirik.
Məncə haqqın sözü, həm də özü
var Pünhanda,
Bu səbəbdən onun ardınca nicatnan gedirik.
13 yanvar, 2002
Türkmənbaşı
Sən fələkdən qorx, ətəkdən tök
daşı türkmənbaşı,
Öylə bilmə dahi sənsən, biz naşı türkmənbaşı.
Ağcaqum vaqeəsindən sonra mən
hiss etmişəm,
Ayrıdır türkmən başıynan, türk başı türkmənbaşı.
Doğrudur türksən fəqət başdan
bir az məfrağsan,
İncidirsən biz müsəlman qardaşı türkmənbaşı.
Bizdə baş dərmanı çoxdur,
məsləhətdir başuva,
Saldıra bir cüt zopa türk fərraşı türkmənbaşı.
Bircə mən bildim nə məqsədlə
qaraltdın saçını,
Qoy qarasız olmasın türkmən aşı türkmənbaşı.
Bu nəsil ki, bizdə vardır bir
Xəzər çatmaz bizə,
İstəyirsən böyrünə vur Balxaşı türkmənbaşı.
Öz aramızdır bu iş sənnik deyil
al boynuva,
Kim deyib qan çıxmayan yerdən qaşı türkmənbaşı.
Sən bilərsən hansı bir məqsəddi
sammitdən sora,
Çəkdi göy dəryaya Putin yoldaşı türkmənbaşı.
Bizdə yaşnan bağlı çox iş var
ki, həllin tapmayır,
Bax bu işlərdən dənizdir ən yaşı türkmənbaşı.
Atdığın daş Pünhana neynər əgər
hər gün ona,
Kim Vətən daşı atır, kim yad daşı türkmənbaşı.
21 may, 2002
Çəkirlər dala
Vaxtı verirlər qabağa əlbəəl,
Amma güzaranı çəkirlər dala.
Keçdi zaman hökmünə əqrəblərin,
Zəhri verib canı çəkirlər dala.
Öndə gedir əqrəbi hər kim tutur,
Tutmayan insanı çəkirlər dala.
İstəyirik bir balaca dirçələk,
Hər cürə imkanı çəkirlər dala.
Gah bizə şirvanın ucun göstərib,
Gah da ki, şirvanı çəkirlər dala.
İşdə verirlər qabağa qızları,
Amma ki, oğlanı çəkirlər dala.
Soyqırığa sərf eləmir soyqırım,
Bax odu qəltanı çəkirlər dala.
Bir kərə meydan verib azadlığa,
Yüz kərə meydanı çəkirlər dala.
İldən-ilə milləti lüttəndirib,
Əhli -müsəlmanı çəkirlər dala.
Şah damarından Bakının sallanıb,
Azərbaycanı çəkirlər dala.
Fəsli-payızda doğulan Əqrəbəm,
Bax odu Pünhanı çəkirlər dala.
2 aprel, 2002
Boynuna böhtan ataq
İş vuraq, dinc durmayaq, iş
vurmaq üçün can ataq,
Xəlqə kim imdad edirsə biz ona hədyan ataq.
Gəl çıxardaq Az.Tv-yə ac-susuz
yaltaqları,
Bir yalançün ağzına üç-dörd dənə şirvan ataq.
Pul alıb ağır cəzanı bir fəqirin
boynuna,
Qoymaq üçün üstünə beş-altı damcı qan ataq.
Ya gərəkdir haqq olub, qanunu
düz icra edək,
Ya gərək alçaqlıq ilə boynuna böhtan ataq.
Erməniyçün bir belə əldən
gedirsə gərçi bu,
Böylə təklif var onun soy adına bir yan ataq.
Torpağı zornan bizə verdirdilər
ki, biz gəlib,
Abşeron torpaqlarında bağ salaq bostan ataq.
Xəstəlik cansızda yardım dərmanı
qansızdadır,
Verməyir ki, ölməməkçün ayda bir dərman ataq.
Çox zaman Pünhana dəstək
verməsək də aşikar,
Haqq sözə, heç olmasa, imzamızı pünhan ataq.
6 aprel, 2002
Altımız üstdən
bilinir
Adamın yaxşısı yaxşı, pisi
pisdən bilinir,
Necə ki, düz cavabın qiyməti testdən bilinir.
Qarabağ dərdi üzüb milləti
naziltdi tamam,
Elə naziltdi ki, lap altımız üstdən bilinir.
Xocalı dərdinə biganə olan bir
kişinin,
Xoş olan qeyrəti də seçdiyi Mis dən bilinir.
Ürəyin gizlədib amma göbəyin
üstün açan,
Hər qızın tərbiyəsi aldığı dərsdən bilinir.
İşinin xatirinə hörmətinin
saxtalığı,
Kabinetdə yanına qoyduğu büstdən bilinir.
Pozğun əxlaqı bizə "Qərb"
klipnən yeridir,
Bu kanallarda gedən mahnı seksdən bilinir.
Aşikarlıq o deyil ki, soyunub
lüttənəsən,
Lüt olan haqdır o qulpdan, ANS-dən bilinir.
18 may, 2001
Torpağı ehsanlıq olar
Min günahın cavabı həşrdə bir
anlıq olar,
Cəmi bir anın içində hərə bir yanlıq olar.
Başuva döyməginən getsə əlindən
vətənin,
Göyə bağlanmayanın torpağı ehsanlıq olar.
Erməni arvadın ilə aranı vurma
hələ,
Yüksək status olan vaxtı peşimanlıq olar.
Bu elin başına kim saldı
dəyirman daşını,
Gün gələr ki, onun öz başı dəyirmanlıq olar.
Neçə evlər yıxıb üstündə
saraylar tikənin,
Rəsmdir xəlqi üçün qəlbi qəbiristanlıq olar.
Nəfsə qulluq edənin rütbəsi
şeytan nökəri,
Haqqa qulluq edənin rütbəsi insanlıq olar.
Günlərin bir günü Pünhan Babadan
ayrı düşər,
Baba torpaqlıq olar, Pünhan asimanlıq olar.
11 mart, 2001
Toylar belə toylardı
Toy tutdu bizə düşman, toylar
belə toylardı.
Toy nəğməsi Ərrəhman, toylar belə toylardı.
Bu toyda gəlinlərmiz, əğyarə
gəlin oldu,
Bəylər də qana qəltan, toylar belə toylardı.
Bilməm kim unutdurdu, xəlqə bu
ağır dərdi,
Şənlik oxudu meydan, toylar belə toylardı.
Məğlubiyət eşqiylə, çox şadlıq
evi açdıq,
Xankəndi, Şuşa, Dilcan, toylar belə toylardı.
Qol açdı uduzmuşlar, pərvaz
elədi quş tək,
Odlandı Azərbaycan, toylar belə toylardı.
Qışqırdı: Vətən dərdi, öldürdü
məni saqi,
Süz dalbadala şampan, toylar belə toylardı.
Çöllərdə çadırlarda, qızlar
qarıdı il-il,
Sevdaları sərgardan, toylar belə toylardı.
Borc ilə cehiz aldı, toydan da
qalan heç nə,
İndi oturub peşman, toylar belə toylardı.
Bəynən gəlini gördüm, keçdi
Quran altından,
Amma ki, gəlin üryan, toylar belə toylardı.
Mümkünsə toya dəvət, etmə Baba
Pünhanı,
Pul salmağa yox imkan, toylar belə toylardı.
5 fevral, 2001
O bilər – mən bilərəm
Bivəfadırsa əgər yar, o bilər -
mən bilərəm,
Ya vəfa əhlidi dildar, o bilər - mən bilərəm.
Nə düşüb xəlqə axı hər şeyə
rişxənd eləyir,
Qeyri dindardı ya dindar, o bilər - mən bilərəm.
Məni cadulər ilən salma gözündən
o gülün,
Çalma kandarıma mismar, o bilər - mən bilərəm.
Dedim ol yarə hicabı sənə vacib
bilib həqq,
Dedi ki, eyləmə israr o bilər - mən bilərəm.
Dəstəmazım gözümün yaşı
namazımdı muğam,
Bunda həqqəm ya günahkar o bilər-mən bilərəm.
Məni gah Tanrı çəkib qaldırar
ərşin üzünə,
Gahi ordan yerə çırpar, o bilər - mən bilərəm.
Can alanım ikidir, göydə fələk,
yerdə mələk,
Desələr hansıdı qəddar, o bilər - mən bilərəm.
Pünhanın eyblərin yarə gedib kim
saydı,
Kimə nə, eybi əgər var, o bilər - mən bilərəm.
20 iyun, 2001
İmkan olar biz
bilmərik
Qorxuram yellər əsər, tufan olar
biz bilmərik,
Yer dinər, göy dindirər divan olar biz bilmərik.
Bir saray tikdirmək üçün onlar
ilən ev yıxan,
Qəsbkarın var-yoxu viran olar biz bilmərik.
Faiz ilən borc verib, çox
borclunu ağlar qoyan,
Nanəciblər qanına qəltan olar biz bilmərik.
Qorxuram ki, Zülfüqarın sahibi
pünhan gələr,
Zülmükarın göz yaşı leysan olar biz bilmərik.
Harda rüşvət var, talan var, ver
bizə ünvanını,
Son nəfəsdə almağa imkan olar biz bilmərik.
Qorxuram ekranda lüt əndamını
göstərməyə,
Özgələr bizdən qabaq üryan olar biz bilmərik.
Biz bu torpaq söhbətin dartdıqca
hey saqqız kimi,
Tazə-tazə bölgələr ehsan olar biz bilmərik.
İblisə dəstək verib düşmənlə
dost olsaq əgər,
Bir zamanlar dost bizə düşman olar biz bilmərik.
Əsrlərdir Baküyə yol qət edən
Sahib Zaman,
Gəlməyindən qorxuram peşman olar biz bilmərik.
Göz qulaqda ol ki, Pünhan,
xalqın üstündən düşən,
İqtidarın örtdüyü yorğan olar biz bilmərik.
3 aprel, 2001
Bakının dərdi var
Yorğundur, yatmayır haçandan
Bakı,
Doyub yad ellidən, qaçqından Bakı.
Üzülüb, öləcək acından Bakı,
Məğrur görünsə də o can üstədir,
Bakının dərdi var Bakı xəstədir.
Yaltaqlar dəstəsi baş alıb gedir,
Qeyrət yavaş-yavaş boşalıb
gedir,
Məktəbli qızlar da qaş alıb gedir,
Ərli də, ərsiz də bir
həvəsdədir.
Bakının dərdi var, Bakı xəstədir.
Əsrlər itirdik illər içində,
Qanqallar bitirdik güllər içində,
Çaqqallar dolaşır ellər içində,
Aslanlar, pələnglər daş qəfəsdədir,
Bakının dərdi var, Bakı
xəstədir.
O, Cıdır düzüyçün çadır ağlayır,
Çadır övladıyçün Cıdır ağlayır,
Namus itkin düşüb abır ağlayır,
Köməksiz qız-gəlin
dəstə-dəstədir.
Bakının dərdi var, Bakı xəstədir.
Sən ey "Qız qalası" qalasan
hələ,
Səni həmişə qız qalasan hələ,
Dərdini Pünhana qala sən hələ,
Ta ki, göz yollarda qulaq səsdədir,
Bakının dərdi var Bakı xəstədir.
13 may, 2001
Pulun göstərir
Get-gedə dövran özü insanların,
Dəymişi halında kalın göstərir.
Heç nə yox, ancaq şəhərin
qızları,
Azərbaycanın halın göstərir.
Xalqının artisti olandan sora,
Xalqına şalvarda dalın göstərir.
Kəndi təzəknən qızınan ölkəmiz,
Neft kimi dünyaya malın göstərir.
And içərəm, hakim öz övladına,
Rüşvətin ən yaxşı yolun göstərir.
Nəmli betondan tutulub dizləri,
Dost ona parketli polun göstərir.
Hündür ev inşa eləyən hər adam,
Böylə hədis var ki, pulun göstərir.
Öz ərinin razılığıynan demə,
Əndamın hər yerdə yalın göstərir.
Səbr elə, Pünhan, yetişir haqq
günü,
İblis oyunda finalın göstərir.
22 yanvar, 2001
Qumar onun qumarıdır
Nə var - nə yox soruşma çox, nə
var onun nəvarıdır,
Mənim evimdə qar yağır, bahar onun baharıdır.
Xuda mənim məkanımı yazıb dəniz
kənarına,
Nədəndi boş sular mənim kənar onun kənarıdır.
Əkil odur, bəkil odur, şəkil
odur, vəkil odur,
Əlil mənəm, zəlil mənəm ssenar onun ssenarıdır.
Yuxumda gördüm ölmüşəm, qəbir də
ki, "platnı"du,
Pul olmadı girim yerə, bazar onun bazarıdır.
Pıçıldayıb Səbayeli, qulağma
gizli söz dedi,
İmam gəlincə döz dedi diyar onun diyarıdır.
Qarabağım üzük qaşı, üzük-üzük
olub daşı,
Oyun böyükdü biz naşı, qumar onun qumarıdır.
Dili qübarlı bir ana, dəvaya
gəldi vermədin,
Anan qübardan ölsə bil, qübar onun qubarıdır.
Alıb Baba tüfəngini, atır sözün
qəşəngini,
Dəyib qaçırtsa rəngini, şikar onun şikarıdır.
15 yanvar, 2002
